ДРАГАН ВЕЛИКИЌ

Драган Великиќ е роден во 1953 година во Белград. Детството и младоста ги поминал во хрватскиот град Пула, на јадранскиот брег.
Дипломирал компаративна книжевност и теорија на книжевноста на Филолошкиот факултет при Универзитетот во Белград.
Од 1995 година до пролетта 1999 година бил главен и одговорен уредник во издавачката куќа на Независното радио Б92 во Белград. Во март 1999 година заминал во егзил во Будимпешта и Виена. Во Белград се вратил во декември 2000 година.
Од јуни 2005 до ноември 2009 година, Великиќ бил амбасадор на Србија во Австрија. Живее во Белград и работи како слободен писател.
Великиќ има објавено дванаесет романи: „Виа Пула“ (1988), „Астрахан“ (1991), „Хамсин 51“ (1993), „Северен бедем“ (1995), „Плоштадот Данте“ (1997), „Случајот Бремен“ (2001), „Досие Домашевски“ (2003), „Руски прозорец“ (2007), „Бонавиа“ (2012), „Иследник“ (2015), „Адресата“ (2019) и „Виенскиот роман“ (2024), три книги раскази и шест книги есеи. Неговите книги се преведени на дваесет европски јазици, како и на арапски и фарси, во осумдесет странски изданија.
За романот „Руски прозорец“ (2007) ги добил НИН-овата награда и наградата „Меша Селимовиќ“ во Србија, како и наградата „Мителеуропа“ во Австрија. „Руски прозорец“ во Србија е објавен во 16 изданија. За романот „Иследник“ ја добил својата втора НИН-ова награда, а романот е продаден во 50.000 примероци.
Во 2013 година, Драган Великиќ ја добил Наградата на градот Будимпешта за литература, а во 2019 година и Меѓународната книжевна награда „Виленица“.
Тој е член на Унгарската академија за уметност и книжевност „Сечени“.

ДИЈАНА ЧУЛИ

Дијана Чули е родена во Тирана, Албанија, каде што и живее. Таа е позната писателка, новинарка и преведувачка. Дипломирала јазици и книжевност на Филолошко-историскиот факултет при Универзитетот во Тирана.

Дијана Чули е авторка на повеќе романи, збирки раскази, драми и сценарија за играни филмови. Некои од нејзините романи, како Еленот од тротоарите, Ангели борци и Убиство во премиерскиот кабинет, се дел од училишната наставна програма во Албанија.

Дијана Чули е активна во женското движење и била избрана за претседателка на националната мрежа Албански женски форум.

Во периодот од 2005 до 2009 година, Дијана Чули била пратеничка во албанскиот Парламент.

Дијана Чули има добиено повеќе книжевни награди за своите дела. Романот Ангели борци е прогласен за најдобра книга за 2007 година од жирито на Саемот на книгата во Тирана. Убиство во премиерскиот кабинет ја добил наградата на Академијата КУЛТ во 2019 година, во Тирана. Повеќе нејзини романи се објавени во Италија, Грција, Северна Македонија, Кина, Египет и други земји.

Дијана Чули на албански јазик ги преведува авторите Жан-Пол Сартр, Симон де Бовоар, Умберто Еко, Сомерсет Мом, Оскар Вајлд, Џон Ирвинг и други. Добитничка е и на награди за своите книжевни преводи.

БЛАЖЕ МИНЕВСКИ

Блаже Миневски (1961) е прозаист и драмски автор. Автор е на десет романи. За романот „Нишан“ ги доби наградите „Стале Попов“ и „Роман на годината“, и наградата на Град Скопје – „13-ти Ноември“, а за романот „Свирци“ – наградата „Прозни мајстори“ на фондацијата Македонија презент.

Миневски ја има добиено и наградата „Најчитан автор“, признание што го доделува Националната библиотека „Свети Климент Охридски“ од Скопје.

За романот „Ако се родат некакви чувства“, посветен на љубовта на Гоце Делчев и Јанка Каневче, Миневски ги доби наградите „Стале Попов“ и „Рациново признание“ по вторпат.

Освен досега објавените романи, Миневски има публикувано и неколку книги раскази, меѓу кои се „Пристапната беседа на академик Сисое“, „Во рогот на волот“ и „Сезона на глуварките“ за која го доби престижното „Рациново признание“.

Неговите драмски текстови со години беа на репертоарите на македонските професионални театри, но се играа и како премиери на Охридско и на Скопско лето, а за пиесата „Немушт јазик“ ја доби наградата на МНТ за најдобар драмски текст во 2001 година.

Романите „Јас, Тито и Мики Маус“, „Нишан“ и „Мрежата на мамли“ се преведени и објавени на српски јазик во Белград, а романите „Требаше да се сликаме пред да се замразиме“ и „Мемоарите на една млечка“ се преведени и објавени на бугарски јазик.

Романот „Нишан“ е преведен и објавен на англиски, италијански, ерменски, бугарски, словенечки, арапски, кинески и на полски јазик.

Блаже Миневски е застапен во сите антологии на македонската кратка проза објавени последните триесетина година во Македонија и надвор од неа, а за неговите раскази, преведени на повеќе од дваесет јазици во светот, е многукратен добитник на наградите „Студентски збор“, „Нова Македонија“, и „Живко Чинго“.

ГАБРИЕЛА БАБНИК УАТАРА

Габриела Бабник Уатара (родена на 3 септември 1979 година во Гепинген, Германија) е словенечка романсиерка, книжевна критичарка, преведувачка, уредничка и менторка за креативно пишување. Магистрирала на Универзитетот во Љубљана на тема современ нигериски роман и е еден од водечките гласови на современата словенечка книжевност, особено во областите на постколонијалната книжевност, идентитетот, миграцијата и интеркултурниот дијалог.

Авторка е на седум романи и две збирки раскази. Нејзиниот роман Сушна доба (Sušna doba) ја доби Европската награда за литература во 2013 година и е преведен на петнаесет јазици. Нејзините дела се објавени и на англиски, француски, италијански, германски, грчки, романски, унгарски, холандски и на неколку јужнословенски јазици.

Покрај прозното творештво, Бабник Уатара е истакната книжевна критичарка и преведувачка, позната особено по тоа што на словенечките читатели им ги претставува делата на африкански автори, меѓу кои и Чимаманда Нгози Адичи. Извршувала значајни функции во Друштвото на словенечките писатели и во Словенечката агенција за книга, била кураторка на книжевни фестивали, предавала словенечки јазик и книжевност и редовно води работилници за креативно пишување.

Таа е и основачка на Издавачката куќа Хирондел (www.hirondelle.si), независна издавачка куќа посветена на повеќејазичната книжевност и на книжевната размена меѓу Централна Европа, Африка и арапскиот свет. Таа е и уредничка на книжевната платформа Јантарна ластовичка (Jantarna lastovka), која промовира меѓународна книжевност, книжевна критика и културен дијалог.

НИКОЛАЈ ТЕРЗИЈСКИ

Николај Терзијски (1983) е сценарист и соводител на популарна ТВ-емисија за политика и литература. Неговиот дебитантски роман „Екскомуникација“ (2017) стекна огромна база на обожаватели, а првото издание на книгата се распродаде за помалку од шест месеци. „Екскомуникација“ ја освои првата награда во категоријата Проза на престижниот национален конкурс за дебитанти „Јужна пролет“. Исто така, влезе во најтесниот избор за наградата „Перото“ за својот придонес во бугарскиот литературен контекст. Со својата втора книга „Хроники на непознатото“ (2019), Терзијски цврсто се етаблираше како романописец со длабок интерес за семејните истории, со нивните корени и гранки длабоко во минатото, неизбежноста на судбината, љубовта и омразата, војната и сочувството. „Ѕвезди под капаците“ е третиот роман на Терзијски, објавен во 2022 година, кој се најде на полиците на македонски јазик во 2025 година (Издавачки центар ТРИ), а во подготовка се и изданија на арапски и хрватски јазик. „Родинија“ е најновиот наслов на Николај, кој беше топло примен и од критиката и од публиката.

МАЈК ДАУНИ

Мајк Дауни е писател, филмски автор и активист. Како автор на публицистика, Мајк има објавувано трудови на најразлични теми и зад себе има богата архива текстови во публикации од „Вог“ до „Варајети“, од „Скрин“ до „Стилс“ и „Синеаст“, откако во деведесеттите години ја соосноваше медиумската издавачка група „Мувинг Пикчерс“.

Како филмски деец, соработувал со писатели како Џејмс Елрој, Гинтер Грас, Колм Тојбин, Ли Хол, Давид Гросман и основачот на „Вајс“, Шејн Смит, како и со широк круг режисери, меѓу кои Агњешка Холанд, Фолкер Шлендорф, Питер Гринавеј, Оливер Хиршбигел, Асгар Фархади, Вивијан Ку, Рјусуке Хамагучи и Мохсен Махмалбаф. Како претседавач на Европската филмска академија, тој беше соосновач на Меѓународната коалиција за загрозени филмски дејци и една деценија беше член на одборот на повереници на Алијансата „Бела панделка“ („Вајт Рибон Алајанс“).

Како поранешен гостувачки професор по филм со звањето „Томас Јуинг“ на Универзитетот во Охајо, во 2021 година тој стана почесен претседател на филмската награда ЛУКС, која ја доделува Европскиот парламент, а истата година му беше доделен и орденот О.Б.Е. (Орден на Британската Империја) на роденденската листа на признанија на Кралицата за неговите заслуги кон британскиот филм. Во 2022 година, Универзитетот во Ворик му додели на Мајк почесен докторат по литература, D.Litt., honoris causa, за неговиот придонес кон светската кинематографија, а во септември 2026 година ја доби и наградата за животно дело од грузиската филмска индустрија на Меѓународниот филмски фестивал во Батуми, по сличните признанија од Исланд, Соединетите Американски Држави и Чешка. На Канскиот филмски фестивал во 2026 година, Мајк продуцираше два филма во натпреварувачката програма: „Оддеднаш“ на Рјусуке Хамагучи и „Паралелни приказни“ на Асгар Фархади. „Истарско црно“ е вториот дел од трилогијата „Три бои Истра“, по светскиот бестселер „Истарското злато“, во која е прикажан делот од светот кој Мајк Дауни го нарекува свој дом: Истра.

ХРИСТИНА РАДОВИЌ АНДРИЌ

Христина Радовиќ Андриќ е родена на 15 јануари 1970 година во Белград, Србија. До објавувањето на својата втора книга, таа водела возбудлив и емотивно богат живот, полн со подеми и падови – од пионерка во времето на Тито, преку студентка на Академијата за применета уметност, до самохрана и самостојна мајка. Нејзината препознатлива супермоќ е истрајната способност секогаш одново да почнува од нула, секојпат со ненаметлив ентузијазам изразен преку мали лични побуни. Се испробала и во светот на модата, и на пистата и надвор од неа, како и во уредувањето ентериери, цртањето, сликањето и дигиталните колажи, од кои некои биле и јавно изложувани. Поголемиот дел од својот работен век го поминала како графичка дизајнерка и за својата работа добила повеќе награди. Секогаш привлечена од предизвиците и постојаните промени, седум години била креативна партнерка на еден ноќен клуб, каде што го организирала музичкиот и другиот програм, а истовремено се грижела и за работата на мала и мрачна, но пред сè исклучително уметничка галерија.
Ја објавила збирката илустрирани приказни „Кану со тенки букви оди побрзо“. Во 2025 година нејзиниот прв роман, „Арјачкиње барјачкиње, кого ќе изберете“, бил избран за победнички ракопис на конкурсот на издавачката куќа „Бука“ за најдобар необјавен роман.
Живее по малку насекаде, а најмногу во природа.
Иако е вдовица, повторно го пронашла човекот на својот живот.
Има две деца и четири кучиња.

ЗИНОВИЈА ВАСИЛЕЈАДИ

Зиновија Василејади е психолог, психотерапевт и психодраматичар. Работи како училишен психолог во приватна образовна институција и има приватна пракса речиси дваесет години. Во текот на својата професионална кариера работела со широка лепеза таргетирани групи и нивните различни потреби, но нејзиниот примарен фокус стана семејната терапија и поддршката за семејствата и децата. Има обемна обука во областа на специјалното образование и психоаналитичките интервенции, а добитничка е и на наградата „Сандлер“ (Sandler Memorial Prize), доделена од Британското психоаналитичко друштво. Во последниве години активна е и на полето на литературата, објавувајќи неколку книги за деца. Мајка е на две деца и сонува за свет во кој духот на детството се прифаќа и негува од луѓе од сите возрасти.