„Скопје fellowship“ програма

Странски издавачки куќи, директори и програмски менаџери на фестивали, литературни агенти и скаути - гости на ПРО-ЗА БАЛКАН.

„Скопје fellowship“ програмата е посветенa на странските издавачи, директори и програмски менаџери на фестивали, литературни агенти и скаути. Фестивалот меѓу првите во регионот воспостави програма посветена на овој профил на гости, и продолжува со несмален интензитет.

Целта на Фелоушип програмата е важните имиња од познатите фестивали и од светот на издаваштвото да ги запознаеме со нашата книжевна сцена, од што, се надеваме, ќе произлезат нови преводи, гостување на писатели странство, промоција на литературата, вмрежување на писателите и културните работници од сферата на издаваштвото и книжевноста со колегите од Европа и светот...

УЧЕСНИЦИ

ЈАНИКА РИТЕР, ЗУРКАМП, ГЕРМАНИЈА

Јаника Ритер најпрвин е стручен соработник во областа на издаваштвото, а потоа студирала славистика и право на универзитетите во Констанс и во Санкт Петербург. Дипломирала со теза за фотографијата во литературните (авто)биографски дела на Весна Волдсворти и Александар Хемон. После неколку години работа во одделот за авторски права во Зуркамп Верлаг Берлин, се префрла во одделот за источноeвропска литература и работи како помошник уредник, фокусирајќи се на литературата од Балканот.

ЏОН О’БРАЈАН, ДАЛКИ АРХИВ ПРЕС, САД

Џон О’Брајан е издавач и основач на Далки архив прес.

Исто така, ангажиран е на Универзитетот Хјустон, Викторија. Има издадено повеќе од 100 научни статии,
како и голем број на рецензии на книги и статии во списанија и весници како што се Harper’s, Village Voice,
The Washington Post, и Chicago Sun-Times.

О’Брајан има добиено Награда за животно дело од Националниот Круг на литературни критичари,
Награда за издавач на годината која ја доделува
Carey-Thomas Publishers Weekly, Distinguished Service Award од Институтот за литература и превод на Кореја,
а исто така е носител на титула Витез од редот на уметностите и книжевноста на Република Франција.

НАЗЛИЏАН КАБАТАШ, КАЛЕМ ЛИТЕРАТУРНА АГЕНЦИЈА, ТУРЦИЈА

Назлиџан Кабаташ е родена во Истанбул. Дипломирала на Универзитетот Карабук во 2017. Таа е преведувач од англиски и има завршено Еразмус во Полска. Сега работи во литературната агенцијата Калем.