Наградата „Прозарт”, што Интернационалниот литературен фестивал „ПРО-ЗА Балкан“ ја доделува на истакнат автор за авторски придонес кон развојот на книжевноста на Балканот, оваа 2021 година му припадна на големиот Мирча Картареску, романски писател со специфичен раскажувачки талент чии прозни дела во почетокот на 21 век се наметнуваат како снажен потенцијал во контекстот на современата европска книжевност.

Мирча Картареску е најпреведуваниот современ романски автор чиј неоспорен квалитет се докажува особено со неговата позната трилогија „Залепување“, која не само што е преведена на скоро сите европски јазици, туку е и клучно книжевно остварување. Картареску е наградуван со престижни домашни и меѓународни признанија меѓу кои најзначајни се: Томас Ман наградата во Германија (2018), Форментор во Шпанија (2018), Грегор фон Рецори наградата во Италија (2015), Австриската државна награда за литература (2015), Лајпцишката награда за книга за европското разбирање (2015), Берлинската награда Дом на светски култури (2015), Големата награда за поезија во Србија (2013), Виленица наградата во Словенија (2011), итн. Во последните години Картареску често се споменува и како сериозен кандидат во трката за Нобеловата награда за литература за што пишуваа и престижните новинарски куќи Гардијан, Идепендент и др. Кон ова голем придонес даваат и другите негови извонредни литературни остварувања како што се „Носталгија“ „Травестии“, „Левант“,„зошто ги сакаме жените“ и др. кои заедно со неговата трилогија го сместија Картареску на престижниот врв на европската и светската литература. До сега надвор од Романија има околу стотина преводи на негови книги за кои меѓународната критика вели дека Картареску не само што е писателот кои во моментов ја одбележува европската книжевност туку и писател од кој има што да се очекува во иднина.

Мирчеа Картареску во моментов работи како професор на универзитетот во Букурешт и како новинар. Член на Сојузот на писателите на Романија, како и на романскиот ПЕН.

Одбор за доделување на наградата “Прозарт”:

Претседател
Ермис Лафазановски
Членови
Александар Прокопиев
Дејан Трајкоски